5-9 декабрь көннәрендә Мәскәүдә Россия авыл яшьләре берлеге унъеллыгына багышланган чаралар узды. Чарада Казан дәүләт аграр университеты вәкилләре, аерым алганда, корпоратив-кластер белем бирү үзәге җитәкчесе, "Россия авыл яшьләре берлеге" Татарстан төбәк иҗтимагый оешмасы рәисе Шаһивәлиев Ленар Рифат улы һәм икътисад институтының беренче курс студенты, "Россия авыл яшьләре берлеге" Татарстан төбәк иҗтимагый оешмасы рәисе урынбасары Шиһабеддинов Руслан Айдар улы катнашты.
Россия авыл яшьләре берлеге ун ел эшләү дәверендә илнең иң эре яшьләр оешмаларының берсе булды. Россия Президенты Владимир Владимирович Путин оешма активистларына үзенең котлау хатын юллаган. Аның фикеренчә, Россия авыл яшьләре берлеге абруйлы оешма булып тора һәм илебез агросәнәгать комплексын үстерүгә, фермерлыкка, эшмәкәрлеккә ярдәм итү, авыл яшьләренә һөнәр сайлауда ярдәм итү, кешеләрнең тормыш сыйфатын күтәрү кебек мөһим бурычларны хәл итүгә зур өлеш кертә.
5 декабрьдә Россия авыл яшьләре берлеге активистлары Россия Хөкүмәте Рәисе урынбасары Алексей Гордеев белән очрашу уздырдылар. Ул 10 ел элек, Россия Федерациясе Авыл хуҗалыгы министры һәм Россия аграр хәрәкәте рәисе буларак, яшьләр оешмасын төзү турындагы инициативаны хуплады. Шулай ук бу көнне Россия Федерациясенең төрле субъектларыннан килгән Россия авыл яшьләре берлеге әгъзалары ирекле ярдәмчеләр елы уңаеннан оештырылган бәйрәм концертында булдылар. Концертта сәламләү сүзе белән Россия Федерациясе Президенты В. В. Путин һәм Россиянең күп кенә танылган артистлары, спортчылар, актерлар һәм музыкантлар чыгыш ясады.
6 декабрьдә Галимнәр йортында Россия авыл яшьләре берлеге унъеллыгына багышланган төп бәйрәм чарасы узды. Кунакларны һәм активистларны эчтәлекле программа көтте: Россия авыл яшьләре берлеге казанышлары интерактив күргәзмәсе, Россия авыл яшьләре берлеге юбилей китабы (анда үз теләкләреңне калдырырга мөмкин иде), иҗади мастер-класслар, төрле төбәкләрдән халык коллективлары чыгышлары. Россия Федерациясе Президенты Администрациясе, Федерация Советы һәм Дәүләт Думасы, Россия авыл хуҗалыгы министрлыгы, Яшьләр эшләре буенча Федераль агентлык, Иҗтимагый палата, Гомумроссия халык фронты һәм Россия авыл яшьләре берлегенең башка партнерлары вәкилләреннән котлаулар яңгырады. Тантаналы кичәдә "Россия авыл яшьләре берлеге" Татарстан төбәк иҗтимагый оешмасы рәисе «Мәгълүмат-консультация бригадалары»проектын тормышка ашыруда иң яхшы координатор буларак грамота белән бүләкләнде.
Икътисад институтының беренче курс студенты,
“Россия авыл яшьләре берлеге” Татарстан төбәк иҗтимагый оешмасы рәисе урынбасары Шиһабеддинов Руслан Айдар улы.