Бүген Казан ДАУ урман хуҗалыгы һәм экология факультеты оештырган тантаналы чаралар булды. Алар халыкара урман көненә яки Бөтендөнья урманнарны яклау көненә багышланган иде, ул 1971 елда нигез салынган һәм шул вакыттан бирле ел саен билгеләп үтелә. Бу көнне гамәлгә кую инициаторы булып 1971 елда 23 нче Генераль Ассамблеядә Европа Авыл Хуҗалыгы Конфедерациясе чыгыш ясады һәм бу идея БМО каршындагы Бөтендөнья Азык-төлек һәм авыл хуҗалыгы оешмасы (ФАО) тарафыннан хупланды. 2012 елда БМО Генераль Ассамблеясы 2012 елның 21 декабрендәге 67/200 номерлы резолюциясе белән ел саен 21 март көнне Халыкара урманнар көнен билгеләп үтүне раслады. Аның максаты - җәмгыятькә урманнарны саклауның мөһимлеге турында һәм аларның әһәмияте турында хәбәрдарлыкны арттыру. Тантаналы чарада Татарстан министрлыклары: урман хуҗалыгы, экология һәм табигый байлыклар, мәгариф вәкилләре катнашты. Халыкара урман көнен уздыруда Арча, Саба, Буа (Рунгин), Бөгелмә районнарының мәктәп урманчылыклары һәм мәктәп укучылары актив катнашты, алар агач эшләнмәләре күргәзмәсен һәм презентацияләр әзерләгәннәр. Саба урман хуҗалыгы шулай ук агач эшләнмәләр күргәзмәсе тәкъдим итте.
Чараның мәртәбәле кунаклары: Татарстан Республикасы Урман хуҗалыгы министры Кузюров Р. А., Казан дәүләт аграр университеты ректоры киңәшчесе, икътисад фәннәре докторы, профессор, Татарстан Республикасының Атказанган фән эшлеклесе, Татарстан Республикасы Фәннәр Академиясе академигы Фәйзрахманов Д. И., Татарстан Республикасы Саба муниципаль районы башлыгы, Татарстан Республикасының Атказанган урманчысы Миңнеханов Р. Н., Татарстан Республикасы Министрлар Кабинеты Аппаратының җир асты байлыкларыннан файдалану, табигать ресурсларын һәм әйләнә-тирә мохитне саклау мәсьәләләре бүлеге башлыгы Фәсхетдинов М. Г., Татарстан Республикасы экология министры урынбасары Тарнавский Г. А. булды.
Кунакларга сәламләү сүзе белән Казан ДАУ ректоры Айрат Рәсим улы Вәлиев мөрәҗәгать итте. Ул барлык катнашучыларга рәхмәт белдерде һәм урманнарны саклау темасының мөһимлеген, шулай ук Россия һәм Татарстан Республикасы Урман хуҗалыгы өчен югары квалификацияле кадрлар әзерләүдә Казан ДАУ аерым миссиясенең әһәмиятен ассызыклады. Татарстан Республикасы Авыл хуҗалыгы һәм азык-төлек министры Кузюров Р. А. чыгышында урманнарның табигать һәм кеше тормышындагы әһәмиятенә аерым игътибар бирелде. “Җәмгыять тормышында урманнарның һәм урман фәненең роле” темасына доклад белән урман хуҗалыгы һәм урман культуралары кафедрасы профессоры Х. Г. Мусин чыгыш ясады. Татарстан Республикасы Саба муниципаль районы башлыгы Р. Н. Миңнеханов чыгышында, Татарстанда урманның милли байлык чыганагы буларак хәзерге торышы турында борчылу яңгырады, аны саклау һәм аңа сак караш булдыру кирәклеге әйтелде. Сәламләү сүзләре, Казан ДАУ адресына бүләкләр һәм рәхмәт сүзләре белән мәктәп урманчылыклары вәкилләре, шулай ук Казан шәһәренең Совет районының 65 нче муниципаль автоном мәктәпкәчә белем бирү учреждениесе мөдире чыгыш ясады.
Йомгаклау өлешендә бүләкләү тантанасы булды, анда Татарстан Республикасы Урман хуҗалыгы министрлыгы һәм Казан ДАУ исеменнән оештыручыларга һәм катнашучыларга мактау грамоталары һәм рәхмәт хатлары тапшырылды.
