1 августтан 5 августка кадәр Биләр музей-тыюлыгында BILER FORUM – Талантлар Университетының традицион җәйге яшьләр мәктәбе узды.
Форумны оештыручылар: Талантлар Университеты, Татарстан Республикасы Мәгариф һәм фән министрлыгы, Татарстан Республикасы Яшьләр эшләре һәм сәүдә министрлыгы ярдәмендә «Сәләт» республика яшьләр иҗтимагый фонды.
Бу елда форумның темасы: «Үз талантымны кулланып, үз тирә-юнемне үстерәм». Һәркем үз тирәсендәге дөньяны яхшы якка үзгәртә ала, әмма кеше нәрсә белән шөгыльләнергә теләгәнен аңларга тиеш? Киләчәкнең кайсы реаль бурычлары аңа кызыклы? Бу сорауларга җавапларга багышланган иде форум - #МШТ2019.
Катнашучылар фән һәм техника, мәдәният һәм сәнгать, социаль иҗат һәм эшмәкәрлек, спорт кебек актуаль мәсьәләләр белән таныштылар, фикер алыштылар һәм хәл иттеләр.
Яшьләр талантлар мәктәбе «2015-2021 елларда Татарстан Республикасында талантлар белән стратегик идарә» дәүләт программасы кысаларында үткәрелә.
Һәр юнәлеш буенча балалар хәзерге вакытта нинди актуаль проблемалар, бурычлар булуын һәм аларны хәл итү өчен ниләр эшләнүен белделәр. Алар остазлар һәм экспертлар белән очраштылар, конкрет бурычларны хәл итүдә үзләрен сынап карадылар, проектлар төзергә һәм гамәлгә ашырырга өйрәнделәр, шулай ук үзләренең һөнәри траекторияләрен тикшерделәр. Экспертлар форумда катнашучылар өчен мастер-класслар үткәрделәр, анда һәр профессионалга нинди күнекмәләр кирәклеге һәм булачак һөнәри эшчәнлекнең үз өлкәсен ничек билгеләргә кирәклеге турында сөйләделәр.
Казан ДАУ әлеге чарада актив катнашты, шул исәптән эксперт сыйфатында 2 һәм 3 августта фәлсәфә һәм хокук кафедрасы мөдире Нәҗметдинова Ф.Т. эшләде, ә 4 августта авыл хуҗалыгы идарәсе кафедрасы укытучысы Сафиуллин Н.А. һөнәри юнәлеш бирүче чаралар үткәрде. Ул университетны интерактив формада тәкъдим итте, катнашучыларга аларның проектларының икътисадый мәсьәләләре буенча консультацияләр бирде.
