Россия Федерациясе Авыл хуҗалыгы министрлыгында коллегиянең йомгаклау утырышы узды. Казан дәүләт аграр университеты ректоры А. Р. Вәлиев тә катнашты. Утырышны ачып, Россия Федерациясе Хөкүмәте Рәисе урынбасары Алексей Гордеев узган ел җитештерү һәм финанс-икътисадый күрсәткечләр буенча да тармак өчен уңышлы булды, дип билгеләп үтте. Вице-премьер агымдагы елда Россия аграрийлары өчен төп бурыч-авыл хуҗалыгы чималы һәм товарлары экспортын арттыруга кагылышлы Президент указын үтәү, шулай ук ил Президенты кушуы буенча авыл территорияләрен комплекслы үстерү буенча эшләнә торган дәүләт программасын үтәү, дип ассызыклады. Агымдагы елның 1 июненә кадәр дәүләт программасы РФ хөкүмәтенә тапшырылырга тиеш, финанслауның фараз күләме 1,5 трлн сумга җитәргә мөмкин.
Үз чиратында, авыл хуҗалыгы министрлыгы башлыгы билгеләп үткәнчә, бүгенге көндә авыл хуҗалыгы Россия икътисадын тизләтелгән үстерү факторларының берсе булып тора. Аерым алганда, азык-төлек сәнәгатендә һәм эчемлекләр җитештерүдә үсешне исәпкә алып, 2018 елда агросәнәгать комплексы индексы 2,3% тәшкил итте. Шул ук вакытта авыл хуҗалыгы товар җитештерүчеләренең салым салуга кадәр табышы 2017 ел дәрәҗәсеннән 15% тан артып киткән. Бу, шул исәптән, аграрийларга дәүләт ярдәме чаралары ярдәмендә дә мөмкин булды.
Дәүләт ярдәме суммасы ел саен арта, ә юнәлешләр исемлеге киңәйтелә. 2017 елда авыл хуҗалыгын үстерү дәүләт программасы чараларына 248,4 миллиард сум, 2018 елда 254,1 миллиард сум акча тотылган. 2019 елда планлаштырылган бюджет күләме 303,6 млрд сумга кадәр арттырылды.
Тармак өчен 2018 елның иң мөһим нәтиҗәләреннән берсе авыл хуҗалыгын үстерүнең Федераль фәнни-техник программасын гамәлгә ашыру булды, аның кысаларында узган елда бәрәңге һәм шикәр чөгендере орлыгын селекцияне үстерү буенча 2 ярдәмче программа расланды. Моннан тыш, ведомство карамагындагы югары уку йортлары бәрәңге, бодай, соя һәм башка культураларның яңа сортларын һәм гибридларын алдылар. Дистәләгән яңа җитештерү технологияләре, программа продуктлары эшләнде, АПК өчен яңа фәнни тәкъдимнәр барлыкка килде.
Авыл территорияләрен комплекслы үстерү буенча дәүләт программасын эшләү һәм гамәлгә ашыру Россия авылы тормышында яңа этап булып торачак. Аның чаралары авыл халкының эш белән тәэмин ителеше һәм керемнәре дәрәҗәсен күтәрүгә, авылда яшәү өчен уңайлы һәм экологик яктан уңай шартлар тудыруга, дәүләт хезмәтләрен ала алуны арттыруга юнәлдерелгән. Президент Федераль Җыенга Юлламасында куйган бурычларны үтәү өчен - авыл хуҗалыгы министрлыгы «Меркурий» электрон ветеринария сертификациясе системасы өстендә эшләвен дәвам итәчәк. Бу чималдан әзер продукциягә кадәр чылбырларны - даими контрольдә тотуны һәм күзәтеп торуны тәэмин итәчәк.
2018 елда Россия берничә стратегик мөһим чит ил базарларын ача алды. Дмитрий Патрушев билгеләп үткәнчә, Россия бүген көндә үк аерым позицияләр буенча авыл хуҗалыгы продукциясен экспортлау буенча лидерлар өчлегенә керә. Татарстан Республикасы Авыл хуҗалыгы һәм азык-төлек министрлыгы башлыгы тышкы сәүдә динамикасы уртача сроклы перспективада Россия АПК продукциясен дөньяның иң эре экспортерлары унлыгына керергә сәләтле дип уйларга нигез бирә, дип белдерде.
